Labels

Monday, June 27, 2016

ஆங்கில ராணுவ முகாமில் இந்திய வீரர்களிடம் சுதந்திர தாகத்தை தூண்டிய பக்கீர்கள் பழங்குடியினர் பட்டியலில் சேர்க்க கோரிக்கை




இந்தியா எங்கள் தாய் நாடு, 
இஸ்லாம் எங்கள் வழிபாடு, 
தமிழே எங்கள் மொழியாகும்,  
தன் மானம் எங்கள் உயிராகும் என தப்ஸ் இசைக்கருவியை இசைத்தவாறு ரமலான் நோன்பு நேரங்களில் அதிகாலை அமைதியை கிழித்துக் கொண்டு உறக்கத்தில் இருக்கும் இஸ்லாமியர்களை எழுப்பும் கணீர் குரலுக்குச் சொந்தக்காரர்கள் பக்கீர்கள் என்று அழைக்கப்படுகிறார்கள்.

கையில் தப்ஸ் என்று அழைக்கப்படும் கொட்டு, கழுத்தில் உருத்திராச்ச மாலை, தலையில் பச்சைத் தலைப்பாகை,  காதில் சுருமா கம்பி என தனித்துவமான அடையாளங்களுடன்  நாடோடிகளாக வலம் வரும் பக்கீர்கள் இந்திய விடுதலைப் போராட்டப் பாடல்கள், தமிழ் இசுலாமிய பாடல்கள், நன்றெறிப் பாடல்களை பாடியவாறு பணம், தானியம், உணவு ஆகியவற்றை யாசகமாகப் பெற்றுக் கொள்கின்றனர். பக்கீர் என்ற சொல் `இரப்பவர்` அல்லது `இரவலர்` என்னும் பொருள் தரக்கூடிய பாரசிக சொல்லில் இருந்து உருவானதாகும். மேலும் பக்கீர் என்றால் உலக வாழ்வியலில் தேவையற்றவர்களாகவும், இறைவனிடம் மட்டும் தேவையுள்ளவர்களாகவும் கருதப்படுகின்றனர்

இது குறித்து ராமநாதபுரத்தைச் சேர்ந்த இஸ்லாமிய மார்க்க அறிஞர் தாகிர் சைபுதின் ‘தி இந்து’ விடம் கூறியதாவது,

இஸ்லாமிய மார்க்கத்தை பின்பற்றிய தமிழ்ப்புலவர்கள், தமிழில் நாட்டுப்புறக் கூறுகளைக் கொண்டு படைக்கப்பட்ட அம்மானை, பள்ளு, குறவஞ்சி, ஊசல் முதலான இலக்கிய வடிவங்களைப் பின்பற்றி பல்வேறு இலக்கியங்களைப் படைத்துள்ளனர்.  அப்புலவர்களின் பாடல்களை பக்கீர்கள் தங்கள் வாய்மொழி மூலம் சமயக் கருத்துக்கள் அடங்கிய இறைவணக்கப் பாடல்கள், கதைப்பாடல்கள் எனப் பல்வேறு வடிவங்களில் இன்று பாடிவருகின்றனர். இதற்காக பக்கீர்கள் முறையான இசைப்பயிற்சிகள் எதனையும் கற்றுக் கொள்வது கிடையாது.  தங்களின் முன்னோர்கள் பாடியதை கேட்டு அப்படியே கேள்வி ஞானமாகப் பாடுகிறார்கள்.

பாடுதல் ஒன்றையே தங்கள் தொழிலாகக் கொண்டுள்ள பக்கீர்களில் ஆண்கள் மட்டும் ஊர்ஊராகச் சென்று மக்கள் மகிழும் வண்ணம் பாடல்களைப் பாடி அவர்கள் கொடுக்கும் தர்மங்களைப் பெற்றுக்கொண்டு இரவு நேரத்தில் அந்தந்த ஊர்களில் தங்கிவிடுகின்றனர்.  இந்த வாழ்க்கை முறை  சங்ககாலப் பாணர் மரபோடு பொருந்திப்பார்க்கும் வகையிலும்  அமைந்துள்ளது.

ஆர்.எஸ்.எஸ் இயக்கத்தின் மூத்தத் தலைவர் வீர சாவர்கர் இந்திய சுதந்திரப் போராட்ட போராட்ட வரலாறு குறித்த எழுதிய எரிமலை என்ற நூலில்,'' ஆங்கில ராணுவ முகாம்களுக்குள் இருந்த இந்திய வீரர்களிடம் ஆங்கிலேயர்களுக்கு எதிரான போராட்ட உத்வேகத்தையும், சிப்பாய்கள் மனதில் விடுதலை தீயையும்  ஆயிரக்கணக்கான முஸ்லிம் பக்கீர்கள் ஏற்படுத்தினார்ககள். தேசயாத்திரை செய்வதாக கூறி பக்கீர்கள் பொது மக்களிடம் சுதந்திரப் போராட்டதை போதித்தனர், என  சிலாகித்து எழுதியுள்ளார்.

2004 ஆம் ஆண்டு டிசம்பரில் சுனாமியால் பாதிக்கபட்ட இந்தியா, இலங்கை, இந்தோனேசியா, தாய்லாந்து, மாலத்தீவு, மியான்மர் ஆகிய ஆறு ஆசிய நாடுகளில் பல்வேறு மதங்களின் பாரம்பரிய இசையை ஆய்வு செய்த  லயா புராஜக்ட்ஸ் என்ற உலக இசை நிறுவனம் அதனை ஆல்பமாக வெளியிட்டு சுனாமியால் இறந்து போனவர்களுக்காக அர்ப்பணித்தது. இந்த இசை ஆல்பத்தில் இந்தியாவின் பாரம்பரிய இசையில் பக்கீர்களின் பாடலும் இடம்பெற்றது.

இன்றைய நவீன ஊடகங்களின் வளர்சியினால் பக்கீர்களின் வாழ்பியலிலும் மாற்றங்கள் ஏற்பட்டுள்ளன. கடந்த 25 ஆண்டுகளுக்கு முன்னர் இஸ்லாமியர்களிடம் பக்கீர்களுக்கு இருந்த செல்வாக்கு இன்று குறைந்துள்ளது.  நன்னெறிகளையும், கதைப் பாடல்களை மக்கள் முன்னால் கொண்டு சென்ற பக்கீர்கள் காலவோட்டத்திற்கு ஏற்ப தங்கள் பாடல்களை திரைப்பட பாடல்களின் மெட்டுக்களில் அமைத்துக் கொள்கிறனர். பொருளாதாரத் தேவைகளுக்காக தொப்பி விற்பவராகவும், பாய் விற்பவராகவும், பூட்டு சாவி விற்பவர்களாகவும் தொழில் புரிந்து வருகின்றனர். 

ஆங்கிலேயர்களுக்கு எதிரான சுதந்திரப்போரில் முக்கியப் பங்காற்றிய பக்கீர்கள் இன்று  வறுமையில் வாடுகின்றனர். பக்கீர்களை பழங்குடியினர் பட்டியலில் சேர்க்க வேண்டும். மேலும் உலமாக்களுக்கு அளிக்கப்படும் ஓய்வூதியம் போல இவர்களுக்கும் ஓய்வூதியமும், சுதந்திரப் போராட்டத்தில் ஈடுபட்டதன் அடையாளமாக  அரசு பேருந்துகளில் பயணம் செய்ய சலுகைகள் வழங்கிடவும் வேண்டும், என்றார்.

No comments:

Post a Comment